Гармунчылар нәселеннән

Шентала районының Сәләй авылыннан Нина Митрофанова гармунчылар гаиләсендә туып үсә. Аның әтисе һәм ике абыйсы да (инде мәрхүмнәр) бик матур итеп гармунда уйнаган.

Бәләкәй Нина да 6-7 класста укыганда ук үзлегеннән өйрәнеп гармун тарта башлый. Соңрак, педагогия училищесында укыганда, баянда уйнарга өйрәнә.

-Бу шөгылем җаныма тынычлык бирә, гармун белән гаилә бәйрәмнәре дә бик күңелле үтә. Мәктәптә дә бу уен коралын кулыма еш алам, - ди башлангыч класслар укытучысы, күптән түгел Чирмешәндә "Уйнагыз, гармуннар!" бәйрәмендә катнашкан Нина Анисимовна.