Чирмешән районының Якты Тау авылыннан 15-16 кеше кичләрен каядыр чыгып китә

Әлеге авыл артистлары бу көннәрдә “гастрольләрдә”. Алар Туфан Миңнуллинның  “Әниләр һәм бәбиләр” әсәрен сәхнәләштереп, район тамашачыларына тәкъдим итә.

-Спектакль бер ананың үз баласыннан баш тарту вакыйгасы белән бәйле. Әлеге хәл, әниләрнең балалар тудыру йортындагы уй-кичерешләре тамашачыга нык тәэсир итә: ул кайсыбер урында елый, икенче урында көлә  я уйга кала, - ди Якты Тау авыл клубының сәнгать җитәкчесе, үзе  төп - Гөлфинә ролен башкарган  Ләйсән Нотфуллина.

Алтмышлап хуҗалыклы, йөз тирәсе кеше гомер итүче кечкенә авылда  спектакльне кую, аны тамашачыга җиткерү  мәшәкатьләренә 15-16 кеше алынган – тугыз хатын-кыз сәхнәдә уйнаса, тагын суфлер, булышучылар, шоферлар белән шулкадәр кеше җыела икән. Декорацияләре - больницаның балалар тудыру бүлеге палатасы.

-Иң олы артистларыбыз, баш табибә ролендә 71 яшьлек Динә апа Мөхлисова,  Дилемманың каенанасын 70 яшьлек Саимә апа Морадыймова, ә инде Дилемма ролен фельдшер-акушерлык пунктында эшләүче Нина Хәмидуллина башкара. Иркәнур Сафина, Әлфия Кәлимуллина,  Галия Сәрвәрова,  Гөлсирин Йосыпова, Мөслимә Абдуллаева уйнавын да халык бик ошатты,   - ди Ләйсән Габделхай кызы.

Якты Тау үзешчәннәре “Әниләр һәм бәбиләр”не үз авылдашларына, Утыз Имән, Иске Кади тамашачыларына күрсәткәннәр дә. Спектакльне районның башка авыллар халкы хозурына да тәкъдим итмәкчеләр.