Безнең Чирмешән
  • Рус Тат
  • Чирмешән районында алдагы бәйрәмнәрдә уяулыкны тәэмин итү турында сөйләштеләр

    Россия көне, Сабан туйлары, Казанда да узачак футбол буенча дөнья чемпионаты алдыннан, алар үткән вакытта да саклык чаралары күрү, гадәттән тыш хәлләрне алдан ук кисәтү мөһим.

    Террорчылыкка каршы район комиссиясенең чираттагы утырышы шушы мәсьәләгә багышланды. Бу чаралар вакытында уяулыкны көчәйтергә, барын да тикшерергә, контрольдә тотарга, чаралар планы эшләргә кирәк. Халык күп җыела, бәйрәмнәр уза торган урыннарда бигрәк тә. Җәмәгать кыркынычсызлыгын тәэмин итү полиция, янгынга каршы часть хезмәткәрләренә, авыл җирлекләре Советларына һәм башкарма комитетларына аеруча зур җаваплылык йөкләнә. Газ, электр, су, телефон челтәрләре гел төзек булырга тиеш. Үзәк больница андый-мондый хәлләргә әзер булсын.

    Оешмаларда дежур торуны оештыру, халыкка барын да аңлату, инструктажлар үткәрү, чит-ят кешеләргә, транспорт чараларына, предметларга игътибар юнәлтү террорчылык һәм экстремизм гамәлләрен кисәтергә булышачак.

    -Монда вак-төяк юк, бу мәсьәләләрне гадиләштермик, - диде район башлыгы Фердинат Дәүләтшин. -Барын да алдан күрик, әлегә моңа вакыт бар.

    Утырышта яшьләрне патриотик тәрбияләү турында да сүз барды. Бу өлкәдә конкрет, махсус программалар эшләү, булганнарын гамәлгә ашыру сорала. Башкарылганнарны күрсәтә дә белик. Яшьләргә үзләрен күрсәтү мөмкинлеге тудырылырга тиеш.

    Автор фотолары

    Нравится
    Поделиться:
    Комментарии (0)
    Осталось символов: