Чирмешәнлеләр, сез спорт белән дусмы?
Тормышта иң кадерле нәрсә — сәламәтлек, чыннан да, ул - кеше бәхетенең нигезе. Ә сәламәт булу өчен нәрсә эшләргә кирәк? Билгеле, спорт белән дус булырга кирәк. Чирмешәнлеләр спорт белән дусмы соң?
Рузилә Мортазина (23 яшь): - Спортны яратмыйм дип әйтә алмыйм. Атнасына ике тапкыр зумба-фитнес түгәрәгенә барам. Күбрәк җәяү йөрергә тырышам.
Айбулат Шәфыйков (11 яшь): - Төрле спорт түгәрәкләренә йөрим. Аеруча ату түгәрәгендә яратып шөгыльләнәм. Беренче генә ел йөрсәм дә, күрсәткечләрем яхшы.
Әсхәт Дәүләтшин (58 яшь): - Инде олыгаеп барсам да, спорт белән даими шөгыльләнергә тырышам, сәламәтлек өчен файдасы күп. Җәен велосипедта йөрим, кышын – чаңгыда, буш вакытта бассейнга барып кайтам, шулай ук стадионда да йөгерәм.
Владислав Миронов (28 яшь): - Аерым спорт төре белән шөгыльләнмәсәм дә, спортка уңай карыйм. Сәламәтлеккә файда булсын дип, машинаны калдырып җәяү йөрим.
Ләйсән Малая (37 яшь): - Спорт белән дуслашырга теләк булса да, вакыт җитми. Эштән кайткач балалар карап, өй эшләрен эшләп кич үтә дә китә.
Александр Долгополов (65 яшь): - Яшь вакытта спорт белән бик дус идем, волейбол, футбол белән шөгыльләндем. Хәзер, олыгаелды шул, яраткан спорт командалары ярышларын телевизордан гына күзәтеп барам.
фото: архив
Следите за самым важным и интересным в Telegram-каналеТатмедиа
Нет комментариев