Иске Кадида Шүрәленең кемне яратмавын белделәр

Марат Гомәров, 25 февраль 2025 - 11:36

232

Шүрәле кемне яратмый? – Былтырны, Су анасының нәрсәсен урлаганнар? – тарагын. Татар мәктәбен тәмамлаучыларга бу, рус теллеләр өчен Пушкин әкиятләре сыман, бик таныш.

Иске Кадида Шүрәленең кемне яратмавын белделәр

Әлбәттә, Иске Кади мәдәният йортында интеллектуаль бәйге – квиз бум оештыручылар ярышны әнә шундый гади генә сораулардан башлады. Ә – ә, болай булса, бәйге кыен түгел икән дип куйгандыр уенда катнашучылар. Тик, кем әйтмешли, эчкәрәк кергән саен квиз (викторина) биремнәре кыенлаша барды. Тычканнар җырлый беләме – белә икән, бөек рус химигы Менделеев гаиләдә 17 нче бала булганмы – әйе, чикерткәләрнең колагы алгы аягында икән. Бәйгедә катнашучылар, тамашачылар да бу көнне әллә никадәр шундый сорауларга җавап эзләде, кызыклы мәгълүматлар белде.

Иске Кади авылы мәдәният йортындагы бу уенны Түбән Кама шәһәрендәге Чирмешән якташлыгы оештырды. Аның тумышы белән шушы авылдан булган җитәкчесе Рәхилә Корбангалиева викторинаны үткәрергә тулы бер команда туплап кайткан.

-Бәйгене 10нар сораудан торган 7 раундта үткәрәбез. Сораулар, күрәсез, сәхнәдәге экранга чыгарыла, командалар сорауларга җавапларын махсус битләргә тутырып жюрига тапшыра, - диде Рәхилә Вәлиҗан кызы.

Уенда алты команда: “Хуҗабикәләр” (Иске Кади), “Хәзинә” (Иске Үтәмеш), “Замандаш” (Якты Тау), “Асылташ” (Иске Кади, Түбән Кама), “Яшьләр” (Иске Кади егетләре), “Чулпан” (мәктәп укучылары, кызлар) катнашты.

Бәйгенең иң олы катнашучысы 75 яшьлек Динә Мөслихова.

-Уен бик мавыктыргыч. Менә кызып та киләбез, уен гына бетә, - диде ул елмаеп.

-Сораулар ничек соң? – диюемә

-Әүвәлгеләре җиңел иде. Җырлар, кинолар белән бәйлеләре кыенрак булды, - диде Динә апа.

“Яшьләр” командасыннан да Ришат Сафинга да (Якты Тау) кинофильмнар белән бәйле сорауларга җавап табу авыррак булган.

-Без яшьләр иске совет фильмнарын белеп бетермибез икән. Ә менә җырлар, җырчылар белән бәйле сораулар ошады. Үзем җырламасам да, татарча җырларны бик яратам, - ди Ришат.

Белеп бетермибез дисә дә, Ришатларның “Яшьләр” командасы бәйгедә җиңү яулады. Уенга районыбызның икенче очыннан килгән, Иске Үтәмешнең “Хәзинә” командасы уенчылары – икенче, “Асылташлар” – өченче. Оештыручылар җиңүчеләрне дә, башка команда уенчыларын да бүләкләр белән сөендерделәр.