Туймәт балын сарманлылар да ярата

-Быел бал “уңышы” бераз соңга калды, азрак та кебек. Инде менә көнбагыш чәчәк ата, чәчәкләр беткән җиргә умарталарга бал җыяр урын булды, әле дә магазин рамнарын алмадык, - ди Миләүшә апа. - Бу көннәрдә генә дә ике фляга бал аерттык. Умарталар белән җәй көне яллар бик эләкми, аларны гел карап торырга, яннарында булырга кирәк. Балалар да кайтып булыша, эш барыбызга да җитә.

Әсәдуллиннарның флягалары тиз бушый, аларның балларын бер авыз иткән кешеләр өйләренә үзләре килеп ала, алдан заказ биреп куялар, үз клиентлары бар.

-Әле күптән түгел генә Сарманнан килеп алдылар. Үзебезгә дә, балаларга да, күчтәнәчкә дә җитә балыбыз, - ди хуҗабикә. - Мин күчтәнәчкә дигәннәрен аерым тутырып куям, кунак килсә буш кул белән җибәрергә яратмыйм.

Тәҗрибә туплаган умартачылар белгәннәре белән дә уртаклаштылар, киңәшләрен дә бирделәр: “Умартачылык бик мәшәкатьле, вак эш, гел алар янында казынырга кирәк. Шулай да, чыгымы барыбер аз, файдасы күп. Күп корпуслы ояларны карарга ансатрак, бездә шундыйлар. (Аларны Сәгыйть үзе ясаган.) Кышкылыкка, умарталарның үзләренә, бер ояга өч рам исәбеннән запас калдырабыз. Элек, сорау туса, авылдагы тәҗрибәле умартачыларга еш мөрәҗәгать иттек, китапларыбыз да кул астында гына торды, Интернетка да кереп чыга идек. Таһир абый Хөсәенов, Вәлиәхмәт абый Шәрифуллин (инде мәрхүмнәр), Мәдинә апа Хәлиуллина, Чумачкадан Атлас Батдаловлар бер вакытта да кире бормадылар, үзләре белгәннәрне өйрәттеләр, күрсәттеләр. Яхшы уңышның сере дөрес һәм белеп карауда булса, бал җыемы күпмедер дәрәҗәдә һава торышына да бәйле.”

Миләүшә Әсәдуллина фотолары