Түбән Кәминкәдә Мортазиннар гаиләсендә юбилей үткәрделәр

-Сиңа әле 90 гына, ә миңа инде 91 тулды, - дип шаяртып куйды 68 ел бергә гомер иткән хәләл җефете Габделәхәт бабай.

Сүз уңаеннан, алар бер көнне – 15 декабрьдә, хәзер инде исеме генә калган, Иншар поселогында дөньяга килгәннәр.

Туган көннәре бер көнгә туры килгәч, кунаклар, теләк теләүчеләр икесенә дә - әби-бабайга да хөрмәт күрсәттеләр, теләкләрен җиткерделәр.

Мортазиннар – иҗади гаилә, шигырь сөйлиләр дә, кулларына баян-гармун алып җырлыйлар. Йорт башлыгы 90 нан узган Габделәхәт бабай үзе  дә сүзгә оста, җыр – моңга  гашыйк кеше икән.

Хәтимә әби дә, Габделәхәт бабай да гомер буе колхоз эшендә хезмәт куйганнар, күп санлы мактау кәгазьләре белән бүләкләнгәннәр. Дүрт бала үстергәннәр. Бүген алар төпчек уллары Исмәгыйль һәм киленнәре Зөлхыя тәрбиясендә гомер кичерәләр.

-Аллага шөкер, матур яшибез, - ди әлеге йортка 28 элек килен булып төшкән Иске Кади кызы Зөлхыя. -  Әти дә, әни дә бик әйбәт, бик сабыр  кешеләр, балаларны үстерергә ярдәм иттеләр.

Бабай да, әби дә гел намазда булганнар, уразаны калдырганнары юк. Әле хәзер дә таяк белән йөресә дә, улыннан җомга намазына мәчеткә илттерә Габделәхәт бабай.

Хәтимә әбине гомер бәйрәме белән котларга район хакимиятеннән, социаль яклау бүлегеннән һәм авыл җирлеге Советыннан да вәкилләр килеп, теләкләр ирештерделәр, бүләкләр тапшырдылар.

фото: автор