Кармыш килене – рус кызы Ольга (Алия) SMSларны да татарча яза

Алия Түбән Кама районы кызы. Булачак ире Илдар белән дә шунда танышалар. Кармыш егет  Уратма авылында комбайнда эшләгән.

Ольга-Алиянең татар авылында яши башлаганына 25 еллап.

- Дөрес, беренче вакытларда авыр булды, барысы да татарча сөйлиләр, аңламыйм, - дип ике дистә ел элек булган вакыйгаларны искә төшереп алды Алия. – Шулай да ансат өйрәндем. Кайбер сүзләрне оныткач, әнидән кат-кат сорарга туры килде. Ул бер дә авырсынмыйча аңлатты. Һәр көнне ишетеп торгач, практикада тел җиңел үзләштерелә.

Алия әүвәл Кармыштагы икмәк пешерү цехында (пекарьняда) эшләгән, хезмәттәшләре - гел татарлар. Аннан соң авыл кибетенә сатучы булып урнаша.

- Кибеткә олы яшьтәге апалар, әбиләр еш килә. Ирексездән алар белән татар телендә аралашырга туры килде. Бу минем өчен яхшы практика булды, - диде әңгәмәдәшем.

Телләр белү Алиягә ярап куя, кая гына барса да, югалып калмый. Алар гаиләдә дә татарча гына сөйләшәләр. Зуферовлар әби-бабайлар җыеп авыз ачтыралар, корбан чалдырып та мәҗлесләр үткәрәләр.

- Алия, татарча укырга-язарга да өйрәндеңме соң? – дигәч.

- Анысы авыррак, бик яхшы килеп чыкмый, - диде.

Безнең сөйләшүгә килендәше Алсу да кушылды.

- Телефоннан SMSларны да татарча яза, безне “сата” әле ул, - дип елмайды Алсу.

Марат Гомәров фотолары