Чирмешән кулибины “Ока” машинасыннан трактор ясаган

Хуҗасы – тракторчысы Сергей Малешин булып чыкты Үзе “әвәләгән” тракторны инде икенче ел шулай хуҗалык эшләренә “җигә” икән.

-Узган кышта җыйдым, эштән соң, буш вакытларда эшләгәнлектән, ясавы өч айларга сузылды,  - дип сүзен башлады ул, тракторын сүндергәннән соң.

- “Йөрәге” “Ока”ныкы бугай?

- Әйе, иске Ока” машинасы сатып алып, шуның двигателен куйдым.  Коробкасы - тапшырулар тартмасы УАЗныкы,  күчәрләре, тәгәрмәчләре -  “Жигули”дан.

- Куәте ничек, көче бармы соң? – дип тагын кызыксынам.

- Яз көне ат сабаныныкы  сыман ике  төрән белән 10 сутыйлап бакчаны сукалап чыктым инде, 20-25 сантиметр тирәнлектә.  Җиңдерә үзе.

Сергей  Викторович  бәрәңгене дә бер буразна алып барырлык итеп үзе ясаган чәчкеч белән утырткан, трактор ярдәмендә төбен дә өйгән, уңышны да казып алган.

-Яхшы техника. Мотоблок сөйрәп йөрисе түгел. Үземнең эшләргә җитә, - ди Чирмешән кулибины.

Сөйләшеп алгач,  ул янә тракторын кабызып  кар төртә башлады. Күршесе эшкә киткән, Сергей аның йорт алдын да бераз чистартып куймакчы икән. “Ока” - тракторның файдасы, димәк, күршеләргә дә тия.