Чирмешән ир-егетләренең хатын-кызларга нинди теләкләре бар?

“Ир – баш, хатын – муен, муен кайсы якка борылса, баш та шунда карый”, дип тә юкка гына әйтмиләр бит.

Ләкин соңгы вакытта хатын-кызлар үзләренә хас булмаган һөнәрләр, шөгыльләр сайлый башлады, җитәкчеләр, хәтта министрлар рәтендә дә гүзәл затларны еш күрәбез.

Сер түгел, ир-егетләрнең күпчелеге хатын-кызларны үзләре белән тигез дәрәҗәгә куярга ашыкмый, үзләренә тиң итеп күрергә теләми. Замана хатын-кызын алар ничек күзаллый икән?

Айрат Кашапов, район үзәк больницасы табибы: - Минемчә, хатын-кызны сабырлык бизи. Замана гүзәл затларына таләпләрендә, теләкләрендә бераз тыелып кала белергә дә кирәктер.

Айдар Кәримов, Туймәт авыл җирлеге башлыгы: - Хатын-кызлар, беренче чиратта, гел хатын-
кыз булып калсыннар иде. Минемчә, алар һәрвакыт тыйнак, матур, пөхтә булырга тиешләр. Дөрес, соңгы вакытта хатын-кызлар ир-егетләргә хас һөнәрләр сайлый башладылар: көрәшәләр, сугыша-лар, машина йөртәләр... Монда безнең – ир-атларның да гаебе бар, “көчле затлар” ничектер икенче планга күчте.

Айнур Заһитов, яшьләрнең ял итү үзәге директоры: - Замана хатын-кызы күп кырлы иҗат кешесе булырга тиеш, дип уйлыйм. Иҗат кешесе – ул гел үсештә, эзләнүдә, һәрвакыт белемен, осталыгын арттырырга тырыша.

Фәрһат Хәйруллин, полиция хезмәткәрләренең ветераннар оешмасы рәисе: - Минемчә, хатын-кыз тырыш, сабыр, ягымлы, киң күңелле, итагатьле, сәләтле, акыллы, белемле булырга тиеш.

Александр Миронов, Күтәмә урта мәктәбе директоры: -Хатын-кызның гаиләдә дә, җәмгыятьтә дә тоткан роле зур һәм үтә җаваплы. Уңган хуҗабикә, үрнәк әни, иренең ышанычлы терәк-таянычы, әти-әниләренең ипле, сабыр кыз-килене булуы өстенә, ул әле белемле, берникадәр дәрәҗәдә педагог-психолог, тормышның һәр өлкәсендә аңлы, үз фикерле һәм тагын әллә никадәр сыйфатларга ия булырга тиеш. 

Марат Гомәров фотосы.