Безнең Чирмешән
  • Рус Тат
  • Иске Сережкинода яз, җәй буш йортларда да ут кабына

    Ул елда яз җитүен түземсезләнеп көтә, алдан җыенып, тизрәк туган авылына кузгала, шунда яшәп ямь таба.

    Константин Демьянович бөтенләй олы кеше түгел әле, сәламәтлеге бераз какшаса да, 66 яшендә өем-өем агачларны бик тиз утынга кисә, бакчада да шөгыль таба.

    -Озак еллар, вахта ысулы белән, Төмән якларында эшләдем, - ди ул. – Мәктәпне бетергәннән бирле бораулаучы булдым, нефтьчеләрдә, газчыларда да хезмәт куйдым.

    Соңгы вакытта Константин Илюхин яздан кышка кадәр Иске Сережкинода яши. Туган авылында рәхәт аңа. Эше дә табыла, туган-тумача белән дә аралашалар. Әле олы кызы Надежда да монда, чираттагы ялында, аның улы да авыл тормышын ярата икән.

    -Әти-әнинең 60 еллык йортының нигезләрен яңартып, профнастил белән тышладык. Түбәсен яптык, - ди ветеран. – Плитәбезгә газ килә, су урамда. Бакчабызда виноградка хәтле бар. Тавыклар асрыйбыз, алар кышкылыкка сеңелемдә кала. Лениногрскида квартирам бар, кызганыч, хатыным гына вафат, әти-әни дә мәрхүмнәр.

     

    Реклама

    -Яшь чакта да җәй буе рәхәтләнеп авылда  тордык. Йорт каршындагы тирәкләр янында таганда атынулар гел истә, - ди Надежда Константиновна. – Авыл зуррак, халык күп иде. Хәзер йортлар азрак, әмма күбесе матур, төзекләнгән.

    Техникасы да бар Константин Демьяновичның – җыйнак кына көпчәкле тракторы – Мәскәү өлкәсендә яшәүче туганының бүләге, вак-төяк эшкә ярап тора.

    Мунчалары да шәп аларның, кайткан-киткән анда юынмыйча, парланмыйча авылда кунак булдым дип саналмый. “Кара” мунча шәп бит ул, утын исе генә ни тора! Ә утын күп монда, дистә елга җитәрлек. Әле бүген дә байтак агач, такта кискәннәр.

    Йорт тирәләре чиста, бакчаларында бик күп чәчәк үсә Илюхиннарның. Алар авылны ярата, аларга әти-әни нигезе кадерле.

    -Иске Сережкинода язын, җәен күп буш йортларның ишекләре ачыла, ут кабына, - ди Иске Үтәмеш авыл җирлеге башлыгы Рәфис Мингулов. – Йортларны матурлыйлар, тирә-юньне җыештыралар.

     

    фото: автор

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: