Чирмешән районының Югары Чегодай егетенә машиналы бүләкләр китергәннәр

-Илсурны 10 яшь тулу уңаеннан гаиләбез белән тәбрикләгән идек, ә бусы көтелмәгән бүләк булды, - ди әнисе Елена. - Улыбызга сюрприз ясаганыгыз өчен зур рәхмәт. “Мәктәпкә җыенырга ярдәм ит!” акцияләре кысаларында да ел саен ярдәм алабыз, рәхмәтләребез чиксез. Әле быел да уку кирәк-яраклары белән мәктәп сумкасы бирделәр, улыбыз моңа бик куанды.

Илсурның туган көне бүләк автомобильләргә бай булды: автомобиль формасындагы шар, автомобиль ясалган торт һәм пульт белән идарә ителә торган автомобиль. Әти-әниләре улларына велосипед бүләк иткәннәр.

Арабызда мәрхәмәтле кешеләр күп. Әккәрәйдән Галина Маркелова Илсурны һава шарлары белән шатландырды, Римма Әхмәтшина бу туган көнгә зефир пешереп килгән, ә Альбина Ахмедова тәмле дә, матур да торт ясаган.

-Бу кызларга без бик рәхмәтле, алар һәрвакыт балаларны куандырырга әзер, - диләр үзәк хезмәткәрләре. - Ярдәм итәргә теләүче башка иганәчеләрне дә көтеп калабыз.

Илсур Лашмандагы коррекцион мәктәптә укый, бу уку елында 4нче сыйныфка бара. Ул буш вакытларында укырга ярата, компьютерда да үзенә шөгыль таба, урамда иптәшләре белән качышлы да уйный. Хәзер яңа велосипедында йөрергә өйрәнә.

-Улыбыз мәктәптә укый башлагач, сизелерлек алга китеш тойдык. Илсур хәрефләрне белсә дә, укый алмый иде, берничә айда укырга да, язарга да өйрәнде, сөйләшүе дә яхшырды. Хәзер кызыклы китаплар, төрле журналлар да укый, - ди Елена Минсәгыйть кызы. - Мәктәпкә иртән автобус белән килеп алалар, китереп куялар. Лашманда шундый мәктәп ачылуына без бик шатландык, яныбызда яшәп белем ала улыбыз. Рәхмәт барысына да.

Автор фотолары