Чирмешән районының Керкәле авылында арендага берьюлы 15 йорт төзелде

Әлеге йортлар авыл хуҗалыгы предприятиесендә эшләүчеләргә арендага бирелә.

-Бүген өч йортта “Ильхан” җәмгыяте хезмәткәрләре яши, - ди Югары Кәминкә авыл җирлеге башлыгы Кирам Гыйләҗев. – Тагын сигез йорт әзер, әлегә алар буш тора. Бу көннәрдә төзүчеләр калган дүрт йортта эшлиләр. 

“Ильхан” җәмгыятенә Башкортостаннан килгән Айрат Кашапов - һөнәре буенча ветеринар.

-Интернеттан белдерү күрдем, - ди Айрат. – Телефон буенча элемтәгә чыккач, җәмгыятьтә эшләүчеләрне торак белән тәэмин итүләрен дә әйттеләр. Яңа йортка бер ел чамасы элек, 1 июньдә күчтек. Кыш чыктык. Өйдә бөтен уңайлыклар бар, су кергән, канализация бар, җылы, якты.

Яшь белгеч әйтүенчә, алар коммуналь хезмәтләр өчен генә түлиләр.

фото: архив