Чирмешән районының 94 яшьлек сугыш ветераны сайлау участогына үзе килеп тавыш бирде
Бөек Ватан сугышы ветераны Габделхак Җиһаншин сайлау участогына үзе килеп тавыш бирде. Югары Чегодайда яшәүче 94 яшьлек якташыбыз, шөкер, аягында йөреп тора, күзлексез дә яхшы күрә, яза, ишетә.
-Үземә ошаган кандидатлар өчен тамга салдым, - ди 18 яшьтән ил азатлыгын яклап көрәшкән, Дан ордены, медальләр белән бүләкләнгән, Эстония, Латвия, Финляндия җирләрен дошманнардан азат итешкән кече сержант Габделхак Җиһанша улы. -Илләр генә тыныч булсын. Сайланган Президент һәм депутатлар яшьләр турында, эш урыннары булдыру, авылларның киләчәге турында ныграк кайгыртсыннар иде.
Габделхак ага тормышыннан канәгать, бүген кызы һәм кияве белән яши.
-Быел, Бөек Җиңүнең 75 еллыгы уңаеннан, кадер-хөрмәт күрсәттеләр, бик күп бүләкләр бирделәр, рәхмәт, - ди якташыбыз.
Сүз уңаеннан, Габделхак Җиһаншинга сайлау комиссиясе, Иске Үтәмеш авыл җирлеге Советы бүген дә бүләк әзерләгәннәр иде.
Следите за самым важным и интересным в Telegram-каналеТатмедиа
Нет комментариев