Чирмешән районының Бәркәтә авылыннан чүпне машиналар алып китә

330 йортлы, 5 урамлы авылда урамга чыгарып куелган чүп капчыкларын атнага бер - чәршәмбе көнне Чирмешәннән килгән машинага төяп китәләр. Бу хезмәт өчен бәркәтәлеләр кеше башыннан ай саен 35 сум түләячәк.

Гомумән, быел районның башка авылларыннан да каты көнкүреш калдыкларын махсус машиналар алып китәчәк. Атнага бер тапкыр, график нигезендә. Билгеле, бу хезмәт түләүле.

Чирмешәндә һәм Лашманда чүпне инде берничә ел үзәкләштерелгән тәртиптә, капчыкларда җыеп, полигонга ташыйлар. Халык моңа тиз күнекте. Ә полигонда калдыкларны сортларга аералар.