Үзеңә зыянга эшләп булмый бит инде

Авыл хуҗалыгына игътибар аз. Бу хакта еш сөйлиләр һәм язалар. Тик, минемчә, авыл халкының конкрет ярдәм генә тойганы юк.

Авылда яшәүчеләргә терлек асрап, яшелчә үстереп тә табыш алырга мөмкин, диләр. Тик ул җитештергән продукцияне сатарга, урнаштырырга урын юк, яки аны ниндидер тиеннәргә җыеп алалар. Әйтик, бүген, бер килограмм сөт өчен безгә нибары 8 сум түлиләр. Ә терлек азыгы исә (печән, фураж) елдан-ел кыйммәтләнә. Сатып алган азык белән мал симертеп аның бер файдасы да калмый, без бары зыянга эшлибез. Җитештерүчеләрне кызыксындыру да кирәк.

Үткән ел һәр савым сыерына субсидия алган идек, быел андый нәрсә дә юк бугай.

Без биш баш сыер асрыйбыз, инде быел баш санын киметергә уйлыйбыз. Дәүләт , җитәкчеләр җитештергән итне, сөтне яхшы бәягә урнаштыру юлларын, мөмкинлекләрен тәкъдим итсә, без бу юлга бармас идек. Бу минем фикер генә түгел, барлык авыл халкы да шулай уйлый.

Олег Миронов.
Лагерка авылы.