Чирмешәндә наркотикларга бәйлелекләре булган ике кешене дәваларга озатканнар

-Наркотик матдәләр эйфория хисләре тудыра: реаль хәлләргә туры килмәгән күтәренке кәеф, канәгатьлек хисе уята; шул ук вакытта наркотиклар кешене үзенә “бәйләп” тә куя, - ди табиб психиатр-нарколог Лилия Мортазина. -Наркотик кулланучы әлеге матдәләргә психик һәм физик яктан бик тиз күнегә: гел наркотиклар хакында уйлый, басылмый торган “ачлык”, “дозалар” арасында озын өзеклек газабы кичерә. Наркотиклар иммунитетны бетерә һәм организмны көчсезләндерә. Венага кадала торган наркотиклар - В, С, А йогышлы гепатит, СПИД китереп чыгаручы ВИЧ йогуына чыганак. Россиядә наркотикларга бәйлелеге барлыкка килгән кешенең гомер озынлыгы гадәттә 5-7 елдан артмый.

Наркотикларның ниндиен генә, яки аларны нинди генә күләмдә куллану да тормыш өчен бик куркыныч. Наркотикларны “җиңелчәгә”, “авырына”, “куркынычка”, “куркыныч булмаганга” бүлү бөтенләй дөрес түгел, зарарсыз наркотик булмый.

фото: архив