Чирмешәндә автоинспекторга ришвәт бирмәкче булган машина йөртүчене 400 мең сум штрафка хөкем иткәннәр

Узган  елның ноябрь аенда ЮХИДИ  хезмәткәрләре туктаткан автомобиль  йөртүчесе – Алтай крае  кешесе исерек булып чыга. Әмма ул  закон  буенча таләп  ителгән медицина  тикшеренүе узудан баш тарта, югыйсә, үзенә 30 мең сум штраф һәм ел ярымнан ике елга кадәр машина йөртүче хокукыннан  мәхрүм  ителү җәзасы янавын бик яхшы белгәндер.

-Шуннан соң административ  җаваплылыктан котылу,  ягъни  төзелгән беркетмәне  юк итү өчен, әлеге машина йөртүче ЮХИДИ  бинасында инспекторга 50 мең сум күләмендә  ришвәт бирмәкче була, - ди  район прокуроры  урынбасары Юрий Иванов. - Рәсми  телдә әйткәндә,  аннан  тормаган сәбәпләр  белән, әлеге җинаять  ахырына  кадәр җиткерелми.

Һәм нәтиҗәдә – җинаять эше һәм суд карары – 400 мең сум күләмендә штраф.

Әлегә хөкем карары гамәлгә кермәгән.

фото: pixabay.com