Чирмешән районының “Сөлчә” җәмгыяте механизаторлары төшке ашка да кайтмыйлар

“Сөлчә” җәмгыятендә эш кайный. Механизаторларның бер төркеме комбайннарны ремонтлау белән мәшгуль.

-Быелгы уракта өч “Дон” һәм бер “Полесье” катнашачак, -ди хуҗалык җитәкчесе Хамзә Хамматов. – Комбайнчылар барысы да тәҗрибәле, уңган, булган егетләр.

Фәндәс Залалетдинов “Дон” комбайнын уракка әзерли.

-Мин бу хуҗалыкта 106нчы һөнәр училищесында укыган вакытта ук практика уздым, -ди ул. – Коллективны да, җитәкчесен дә яхшы беләм. Армиядән кайткач та, урак вакытында комбайнга утырам. Менә бу 2000нчы елгы “Дон”да быел дүртенче сезон эшләячәкмен. Әлеге ремонт бара. Запас частьләр белән проблема юк, ниндигә заказ бирәсең, аны шунда ук алып кайталар. Көненә ике тапкыр ашаталар. Хезмәт хакын да вакытында алабыз.

Җәмгыятьтә күпьеллык үләннәрне дә чаба башлаганнар. Монда Алексей Уламасов тырышып эшли. 20 гектарда чапкычлар узган инде. Сабанашлык культураларын тамырдан тукландыруны, бөртеклеләр участокларында гербицид сиптерүне дәсоңга калдырмыйлар.

Җәмгыять ашханәсе 18 апрельдән эшли башлаган.

-15 еллап биредә аш пешерәм, кыш айларында фермада эшлим, -ди аш пешерүче Елена Михляева. Аңа Таисия Романова булыша. – Нигездә егермеләп кеше ашатабыз, ләкин кайбер көннәрне күбрәк тә булырга мөмкин.

Кырда эшләүче механизаторларга көненә ике тапкыр ашны эш урыннарына алып баралар.

-Әлегә кырга җиде берәмлек техника чыкты, -ди Хамзә Ильяс улы. – Фермаларда да эш бара. Өч бригада биналарны ремонтлый. Яңа Элмәледә бер иске корпуска капиталь ремонт үткәрәбез.

Монда бинаның бер өлешенә идәннәр җәйгәннәр, җиһазларны ремонтлаганнар, яңаларын да урнаштыралар.

Автор фотолары