Чирмешән районы хуҗалыкларында арпа суктыра башладылар

“ЧИРМЕШӘНАГРО”да арпа өлгергән, аны 402 гектардан (56 процент) суктырганнар да. Тулаем әлеге хуҗалыкта бөртекле-кузаклылар тиешле мәйданнарның 43 процент өлешеннән җыелган. Һәр гектардан уртача 30 центнер уңыш чыга.

Район буенча алганда, 8463 гектардан (тиешленең 28 проценты) уңыш суктырылган.

Башкалар белән чагыштырганда, “БИО АГРО”, “Тепсуркаев В.А.” хуҗалыклары уракта өлгерлек күрсәтә.

Уҗым культуралары чәчә башларга да киңәш итә белгечләр, аеруча бодайны күп чәчеп калдырсаң отасың. Быел районда пар җирләре яхшы хәлдә, вакытында эшкәртелгән. Сыйфатлы орлык күмдерсәң, ашлама да кертсәң, уҗым бодае чыгымнарны капламый калмый.

Бүген урак темпын сүрелдермәс өчен техниканы ягулыктан өзмәү кирәк. Кызганыч, бу өлкәдә проблема бар, җитмәсә кайберәүләр көзге кыр эшләрендә катнашучы техникадан болай да аз, кыйммәт дизель ягулыгын салдырудан, урлаудан да чирканмыйлар. Моңа, билгеле, сак хезмәтен көчәйтеп, видеокамералар куеп, угрыларны тиешле җәзага тартып кына котылып буладыр.

Кайбер хуҗалыкларда азык әзерләү начар оешкан, аеруча сенаж салу соңга кала. Хәзер масса да бар, югыйсә.

Автор фотолары