Чирмешән районында юлчыларга эш күп әле

Быел районда юл төзелеше һәм ремонтлау берничә программа кысаларында башкарыла.

Юлчылар, әйтик, региональ әһәмияттәге юлларны капиталь ремонтлау программасы нигезендә Кузай - Нурлат юлын өлешчә капиталь ремонтлыйлар.

Монда ел саен диярлек берничә километр ара төзекләндерелә, быел Яңа Элмәле тирәсендә, 1 километр арада яңа асфальт түшәләчәк. Иске Элмәле чатыннан Ульяновкага кадәр дә, 4 километр арада, юлны ремонтлыйлар. Иске Элмәле янындагы юл киселешендә боҗра да ясамакчылар.

Үткән елда Утыз Имәнгә алып баручы юлның 500 метры шомартылган булса, быел 2 километр 100 метрга беренче катлам асфальт салыначак, әлегә бу участокта җир эшләре бара. Моннан тыш Утыз Имәндә яңа күпер салалар. Акъяр – Чирмешән – Шентала юлының бер километр өлешендә, Күтәмә тирәсендә, асфальт түшәлгән.

Район авыллары да игътибарсыз калмый, берничә торак пунктта юлларны ремонтлау күздә тотылды: кайдадыр вак таш җәячәкләр, кайбер урамнарда асфальт яңарачак. Иске Элмәледә – Стадион, Иске Котышта Байкал һәм Рус урамнары юлларына вак таш түшәлергә тиеш. Биредә эш башлаганнар.

Чирмешәндә дә Гагарин, Ларионов урамнары юлларына яңа асфальт салу ниятләнә.  1 нче һәм 2 нче Чирмешән мәктәбе территорияләрен  шулай ук быел тәртипкә китерергә тиешләр, аларда автомобильләр өчен парковкалар ясау да каралган. 

Район юлчылары юл-урам челтәрләрен норматив хәлгә китерү программасы нигезендә дә конкрет эш алып баралар. Мәсәлән, район үзәгендә, Һади Такташ, Кыр урамнарындагы юлларга өлешчә асфальт түшәү планлаштырылган. Шулай ук өлкәннәр һәм инвалидлар йорт-интернатына керә торган юлны һәм парковканы ремонтлау ниятләнә. 

Бүген тагын кайбер авылларга баручы юлларга капиталь ремонт таләп ителә. Чирмешәннең үзендә дә берникадәр урамнарга транспорт белән кереп булмый, чокыр-чакырлылары, җимерелгәннәре дә байтак. Бәлки, тиздән аларга да чират җитәр.