Чирмешән районының Утыз Имән авылында җиде балалы гаилә йортсыз калган

135 нче Чирмешән янгын сүндерү частеннан белешүебезчә, ут казасы чыкканда, балаларның әти-әниләре бакчада эшли торган булган. Ике балалары үзләре белән, берсе – эштә, берсе кибеттә була. Ә өч бала – 2, 4 һәм 9 яшьлекләр өйдә калганнар.

-Ут чыгар алдыннан өй залында уйнаган балалар янына күршеләре Фәнис Җамалиев кергән була. Ул кинәт кычкырып җибәргән янгын извещателе тавышына борылып караса, веранда януын күреп ала, төтен аш бүлмәсенә үк үрмәли башлаган. Ишектән чыгу инде мөмкин булмый. Шунда Фәнис абый балаларны тәрәзәдән алып чыгып коткара, - ди янгын сүндерү часте начальнигы урынбасары Раил Галимов. – Беренчел фаразлар буенча, ут электрүткәргечләрдән чыккан.

Раил Винер улы әйтүенчә, янгын нәтиҗәсендә йорт һәм мунча тулысынча диярлек янып бетә, аларның буралары гына калган. Күп балалы гаиләне башка торак белән тәэмин итү буенча комиссия эшли.

Раил Галимов фотолары