Чирмешәндә ислам гүзәллеген балалар сурәтләде

Рәсем ясарга яратучы балалар үзләрен дини темада сынап карады. Чирмешән мәчете игълан иткән бәйгегә алар 50дән артык иҗат җимешләре юлланган.

-Бәйгенең аерым җиңүчеләрен билгеләмәдек. Чөнки конкурсантлар арасында үзенә күрә "профессионаллар" - сәнгать мәктәбе укучылары да, андый махсус белем алмаган балалар да бар. Шунлыктан, көч сынашуда катнашкан барлык рәссамнарны да бүләкләдек, - ди Чирмешән мәчете имам-хатыйбы Хәбир Ханов.

Корбан бәйрәме уңаеннан үткәрелгән "Ислам гүзәллеге" бәйгечеләрен дини китаплар, видеовәгазьләр, тәм-томнар белән сөендерделәр. Викторина сорауларына оста җавап бирүчеләр хәтта кыйммәтле түбәтәйләргә дә ия булды.

Бу көнне мәчеткә килгән 240 кешене - әти-әниләрне, балаларны корбан ашы белән дә сыйладылар, вәгазь дә сөйләделәр.

Автор фотолары.