Чирмешәндә “Безнең ишегалды” программасы буенча алты йорт тирәсе матурлана

Совет урамындагы 45, 45а, 47, 49, 51 һәм Дзержинский урамындагы 39а йортларының ишек алларына бордюрлар урнаштырып, яңа асфальт салыначак.

- Подрядчы - “Алексеевскдорстрой” оешмасы иске асфальтны алып, юлны түбәнәйтеп ясыйлар. Бу язгы һәм яңгыр сулары подъездларга кермәсен өчен шулай эшләнә, - ди “Чирмешән” торак милекчеләр ширкәте рәисе Мәсхүт Хөсәенов. – Бу эшләргә 11 миллион сум акча каралган.

Тиешле бер җир катламын алгач, йортларга баручы су һәм канализация челтәрләре дә якыная, шуннан файдаланып, “Чирмешән коммуналь челтәрләре” предприятиесе кайбер урыннарда үткәргечләрне яңага алмаштыра.

Төзүчеләр асфальт һәм җир катламын алып бордюрлар урнаштыра, аслык өчен ком, таш та кайтара башлаганнар.  Бу йортлар тирәсендә эшне озакка сузмаска, июль башларына тәмамларга планлыйлар.

фото: автор