Чирмешән автоинспекторлары яктылык кайтаручы элементларның кирәклеген аңлаталар

Статистикадан күренгәнчә, юл-транспорт вакыйгаларының күпчелеге тәүлекнең караңгы вакытында була.

Машина йөртүчегә бу вакытта машина юлына чыккан кешене күреп калу кыен. Начар һава торышы аркасында, хәл тагын да катлауланырга мөмкин. Киемнәргә тегелгән яктылык кайтаргыч элементлар җәяүлеләрне фаҗигадән саклый ала.  Киемдә яктылык кайтаргычлар куллануны закон да таләп итә, шунсыз тәүлекнең караңгы вакытында торак пунктлар эчендә булмаган  юл кырыеннан баручы яки юл аркылы чыгучы гражданнарны 500 сумга кадәр штрафка тарта алалар.

Районның ЮХИДИ бүлекчәсе инспекторы Сергей Барабашкин әйтүенчә, яктылык кайтаручы элементлар булмаган очракта  балигълык яшенә җитмәгән балаларның әти-әниләре  административ җаваплылыкка да тартылырга мөмкин.

Яктылык кайтаргычларның  әллә нинди төрлеләре (беләзекләр, брошкалар, фликерлар, термонаклейкалар) бар. Сорашулар күрсәткәнчә, өлкән сыйныф укучылары брелокларга һәм баучыкларга (шнурокларга) өстенлек бирәләр икән. ЮХИДИ бүлекчәсе инспекторлары район мәгариф учреждениеләрендә балалар белән очрашулар үткәреп, яктылык кайтаручы элементларның кирәклеге турында аңлаталар. Моңардан тыш юл инспекторлары укучылар белән берлектә төрле акцияләр оештыралар, мәктәпләрдә юлда йөрү кагыйдәләре турында видеофильмнар һәм мультфильмнар күрсәтәләр, чаралар барышында яктылык кайтаргыч элементлар тараталар. Агымдагы елның узган өч аенда районда шундый 339 элемент таратылган.

Фото архивтан