Татарстанда бер хатын тәрбиягә алган балаларын буган, эссе мунчада бикләп тоткан

Әгерҗедә яшәүче бер хатын-кыз, балигъ булмаган ятимнәрне тәрбияләү буенча бурычларын үтәмәүдә гаепләнеп, суд хөкеме алдына басачак. Бу хакта “Челнинские известия” Россия Тикшерү комитетының Татарстандагы Тикшерү идарәсе матбугат хезмәте мәгълүматларына таянып яза.

Тикшерү материалларына караганда, опекун хатын-кыз (2008 һәм 2012 елгы балаларны опекунга алган булган) ике ел буе балаларны җәберләп тоткан. Аларны бернинди сәбәпсез кыйнаган, кулына нәрсә эләксә – шуның белән суккан, башларын тимер чүмеч белән төйгән, буган, бик эссе мунчада бикләп тоткан. Башка төрле җәберләү чараларын да кулланган. Балалар, башка яшәү урынына күчкәч кенә. Опекунның үзләренә карата рәхимсез мөнәсәбәте турында сөйләгән.

Җинаять эше, расланылган гаепләү белән, судка карап тикшерүгә җибәрелгән.

чыганак