Чирмешәннән - Казанга: тату сыйныф ярымфиналга үтте

Әлеге бәйгегә Яр Чаллы, Түбән Кама, Лениногорск, Чистай шәһәрләре һәм Чирмешән мәктәпләреннән барлыгы җиде команда килгән. Командалар “Тату сыйныф серләре” исемле визит карточкаларын тәкъдим иттеләр һәм иҗат проектларын якладылар. Командалар үз эшчәнлекләре белән махсус күргәзмәдә таныштырдылар.

Чирмешән укучылары һәм аларның әти-әниләре жюрины бердәмлекләре, активлыклары һәм иҗади якын килүләре белән сокландырды.

-Безнең сыйныф бик дус, креатив, актив, күпмилләтле. Әти-әниләр дә бердәм, – диде чараны оештыруда актив катнашкан әниләрнең берсе Светлана Севастьянова. – Сыйныф җитәкчесеннән уңдык, Людмила Серендеева балалар белән волонтерлык отряды оештырды. Укучылар патриотик, рухи-әхлакый юнәлештәге чараларда актив катнашалар. Махсус хәрби операциядәге якташларыбызга гуманитар ярдәм җыюга да зур өлеш кертәләр. Балалар, әти-әниләр, хәтта әби-бабайлар да чәйләр, коры ашлар, коры душлар әзерлиләр, йон оекбашлар, мунчалалар бәйлиләр һәм тагын бик күп кирәк-яраклар ясыйлар. Мәктәптә укучылар маскировка челтәрләре дә үрәләр.

Жюри әгъзалары командаларның иҗади чыгышларын, сыйныфларның җәмәгать эшләрендә актив катнашуын югары бәяләде. Чирмешән командасы үзләренең бердәм, ярдәмчел һәм тату коллектив булуын тагын бер кат раслады, шәһәр мәктәпләре алдында сынатмады. Апрель аенда аларны Казанда узачак ярымфинал көтә. Икенче урын алган Яр Чаллы шәһәренең 41 нче мәктәбе дә шулай ук ярымфиналда катнашачак. Өченче урында да ярчаллылылар – 78 нче лицей. Җиңүчеләргә һәм катнашучыларга Дипломнар тапшырдылар.

ФОТОРЕПОРТАЖ