Чирмешән аграр техникумы студентлары Әлмәт шәһәрендә кызыклы сәфәрдә булды.
Чара район инвалидлар җәмгыяте хезмәткәрләре ярдәме белән оештырылды - әлеге сәфәрнең инициаторлары һәм оештыручылары да алар.
Сәфәр катнашучылары Татарстанда беренче һәм бердәнбер булган “Альметрика” интерактив фәнни-танып-белү үзәгенә бардылар. Бу үзәктә фән формулалар аша түгел, ә тере эксперимент аша тәкъдим ителә. Студентлар экскурсоводны гына тыңлап калмадылар, ә физика, биология һәм башка табигый фәннәр законнарын ачык аңлата торган 55 интерактив экспонат белән дә таныштылар.
Егетләргә һәм кызларга аеруча тәҗрибәләр үткәрү мөмкинлеге ошады: мәсәлән, яшеннең ничек барлыкка килүен күрү, үз тавышларының көчен үлчәү яки электр агымының тәэсирен үзләрендә сынап карау. Экскурсия студентларга үзләрен чын тикшеренүчеләр итеп тоярга һәм катлаулы фәнни күренешләргә яңача карарга мөмкинлек бирде.
Сәяхәтнең төп вакыйгасы драма театрында “Әйдә өйләнешик” спектаклен карау булды. Кайбер балалар өчен бу югары сәнгать белән беренче тапкыр очрашу иде.
Нет комментариев