Корымнан – язу карасы, каурыйдан – каләм: Лашманнан Минниса әби балачагын искә алды

-Без беренче сыйныфка кергән елда Бөек Ватан сугышы башланды. Кием дә әллә ни түгел, тамак ягы да такы-токы. Бездә генә түгел, бөтенесендә шундый хәл. Каз каурыен юынып – каләм, мичтәге корымнан язу карасы ясый идек. Мин 7 класс тәмамладым, - дип сөйли Минниса Яруллина.

Булачак ире Габдерәхим, армиядән кайткач, колхозда эшли башлый. Минниса да шунда. Танышалар, өйләнешәләр.

-Мин килгәндә Габдерәхимнәрдә ике сарык бәрәне бар иде, берсен никахка чалдылар. Шулай туйлар иттек, яшәдек. Мәрхүм ирем – атлар фермасында, аннан РТСта вулканизаторщик, мин колхозда: бригадир кая куша – шунда эшләдем, - ди Минниса Зыя кызы.

Яруллиннар ике кыз, ике ул үстергәннәр. Балалары бүген читтә гомер итәләр, аяклары авыртучы әниләрен үзләренә алып китеп чиратлап карыйлар. Ә юбилее көнне төп йортка алып кайтканнар, табын корганнар.

-Их, исәнлек бетте шул. Аяклар эшләми, әнә куллар да тыңламый, ашаганда икенчесе белән күтәрмәсәң,  якка илтеп сала, - дип шаяртты табында утырганда Минниса әби.

Юбиляр якташыбызга туган көненә район башлыгы Рамил Айбатов та теләкләрен, бүләкләрен җибәргән. Аны район башкарма комитеты җитәкчесе урынбасары Ләйләгөл Моксинова тапшырды.

-Әниебез безгә бик кадерле кеше инде. Әти-әни дә кырыс – строгий булмадылар, алар гел эштә иде. Безне күбрәк әби тәрбияләгәндер, алдарга, урларга ярамаганлыгын ул дин аша җиткерә иде. “Алдасагыз, үлгәч, теге дөньяда кайнар таба ялатырлар үзегездән”, - дия иде. Без аның да, әти-әнинең дә йөзләрен кызартмаска тырышып яшәдек. Алар безгә гел үрнәк булды, - дип сөйләде Минниса әбинең кызы Илһамия.

Марат Гомәров фотолары