Чирмешән аграр техникумы студентлары СВОда катнашучыларга окоп шәмнәре җибәрде

Техникум студентлары һәм белгечләре районнан киткән чираттагы гуманитар ярдәм белән үзләре әзерләгән посылкаларны озаттылар. Бу аларның беренче генә ярдәмнәре түгел.

-Әлеге изге эштән укытучылар да, студентлар да читтә калмады. Студентлар педагоглар җитәкчелегендә 96 окоп шәме ясадылар, - диде техникумның педагог-оештыручысы Рәмзия Долгополова. – Быел маскировка челтәрләре дә үрә башладык. Гуманитар ярдәм тартмаларына болардан кала азык-төлек, дарулар, җылы носкилар һәм башка кирәк-яраклар да салдык. Шунда ук студентлар язган хатлар да урын алды.

Кирәк-яралар сатып алуга акчаларны техникум хезмәткәрләре җыйган, ә студентлар шәмнәр һәм маскировка челтәре үргәннәр. Биредә эш тукталмый, алар яңа посылкалар җыю эшенә керешкәннәр.

-Студентыбыз Данил Тихонов өйләрендә дә окоп шәмнәре ясаган, алар бу изге эшне әтисе белән башкарганнар, - ди Рәмзия Шакир кызы. – Техник хезмәткәребез Валентина Малешина якташларыбызга ун литр бал җибәрде.