Чирмешәндә неонацизм корбаннарына багышланган күчмә фотокүргәзмә ачылды

Бу проект 2025 елның 29 октябрендә Дәүләт Советы стеналарында РФ Федераль Җыелышының Дәүләт Думасы һәм “РИА Новости” мәгълүмат агентлыгының уртак инициативасы буенча туган. Үткән елның декабреннән экспозиция республика оешмалары буйлап сәяхәт итә. Республикабыз районнарының яртысыннан күбрәген узган бу кадрлар безгә Лениногорск районыннан тапшырылды. Киләсе атнада бу күргәзмәне әлмәтлеләр күрә алачак.

Биредә тәкъдим ителгән хәрби хәбәрчеләрнең 30лап фотоларында Киев режимының бомбага тотулары нәтиҗәсендә туганнарын, якыннарын, йортларын югалткан кешеләрнең фаҗигале язмышлары чагыла. Әмма һәр фотокадр - ул бәла-каза гына түгел, ә соңгы елларның иң мөһим вакыйгалары үзәгендә калган кешеләрнең гаҗәеп ныклыгы, батырлыгы һәм өмете турында сөйли.

Чарада район башкарма комитеты җитәкчесе Илнур Җамалетдинов катнашты. Ул тарихи хәтерне саклауның һәм сынаулар каршында калган халык бердәмлегенең мөһимлеген ассызыклады. Һәм Түбән Кама шәһәрендә булган фаҗигане искә алды.

-Бүген без берләшергә тиеш. Биредә күргәннәребез безнең тәвәккәллегебезне ныгытсын һәм бәлагә тарыганнарга ярдәм итәргә этәрсен, - диде ул.

Экспозициядә күпмилләтле халкыбызның бердәмлеген күрсәтүче кадрлар аерым урын алып тора. 2014 елдан башлап төшерелгән кадрлар куркыныч хакыйкатьне ача: безнең алда Донецк һәм Луганск Халык республикаларының, Запорожье һәм Херсон өлкәләрендәге, чик буе төбәкләрендәге җимерелгән больница, балалар бакчалары һәм гыйбадәтханәләре килеп баса. Объективка яклаучысыз калган картлар, җимерелгән язмышлар һәм сугыш өзгән балачак эләккән.