Чирмешәндә быел ике наркоман ачыкланган

Видеоконференция режимында, ТР Президенты Рөстәм Миңнеханов рәислегендә наркотикларга каршы көрәш комиссиясе утырышында наркоманияне вакытында кисәтү һәм профилактикалау турында сөйләштеләр. Республика башлыгы әлеге яман гадәтне кисәтү буенча эштән канәгать булмавын да белдерде. Агымдагы елның 6 аенда республикада наркотиклар һәм психотроп матдәләр белән агулану нәтиҗәсендә 76 кеше үлгән, үткән елның шул чорында – 50. 19 районда бу юнәлештә үсеш күзәтелә. Наркотикларга тартылучыларның күпчелеге яшьләр.

-18 мең кеше яшәгән районда 16 наркоман, булу – уйланырлык. Әлеге ялгыш юлга күбрәк яшьләр кереп китә. Шуның өчен укучыларны, балаларыбызны саклыйк, - диде район башлыгы урынбасары Габдрәшит Җамалтдинов.

Күптән түгел районда бер кеше синтетик наркотик белән тоткарланган, аның буенча тикшерү эшләре бара.

7-11 сыйныф укычылыры һәм техникум студентлары арасында уку елына ике тапкыр тест уздыралар. Аның җавапларын Казанда тикшерәләр һәм куркыныч төркемгә керүче яшүсмерләр ачыклана. Мондый укучыларга наркологка анализ тапшырырга тәкъдим итәләр. Мәктәпләрдә укучылар белән бу юнәлештә әңгәмәләр уздырыла, белгечләр белән авылларга чыгып, мәктәпләрдә ата-аналар җыелышлары уздыру да планлаштырыла.

фото: автор