Әмирдә Сабантуйга бүләкләр җыйдылар (+ФОТО)

Әмирдә, элеккеге гадәт буенча, апрельнең беренче шимбәсендә сөлге җыйдылар.

Армиягә алынасы, урамнарда авыл көен җырлап узган егетләргә һәр йортта бүләк бирделәр.

Инде егерме еллап йөри-йөри шомарган колгага, билгеле, иң әүвәл чигүле сөлгеләр, чигүле кулъяулыклар элделәр. Былтыр Әмирдә өч яшь пар гаилә корган: Айдар һәм Динара Мөхәммәтшиннар, Илсур һәм Алия Җиһаншиннар, Инсаф һәм Миләүшә Минхәеровларның килен сөлгеләре, бу көнне җыелган бик күп баш яулыклары да киләсе Сабантуй уеннарында җиңүчеләргә кадерле бүләк булачак.