Көн темасы
Чирмешәндә чүпне капчыкларда җыячаклар
20 майдан башлап, Чирмешәннең Кыр, Чишмә, Макаринская, Нагорная, Карл Маркс, Гагарин, Дзержинский, Совет, 22нче партсъезд урамнарыннан һәм Ярминкә тыкрыгыннан чүп контейнерлары алыначак, аларда да каты көнкүреш калдыкларын капчыкларда җыя башлаячаклар.
-Район үзәгенең көнчыгыш өлешендә инде ике елдан артык чүп - чарны капчыкларда җыюга күчтек, - ди Чирмешән авыл җирлеге башкарма комитеты җитәкчесе Светлана Ганиева. - Әүвәл әлеге яңалык уңаеннан дәгъва белдерүчеләр булса да, хәзер инде халык моңа күнекте. Киресенчә,күпчелек бик канәгать, чүп контейнерлары алынгач, урамнар чистарып калды, диләр.
Алда атап киткән урамнарда "Чирмешән районы коммуналь челтәрләре" җәмгыяте транспорты чүп-чарны атнага бер тапкыр - җомга көнне җыячак. Аларда, алда язылганча, контейнерларны алачаклар. Совет урамындагы күп квартиралы йортлар янында гына бункерлар кала.
-Форсаттан файдаланып, райондашларыбыздан чүп - чарны капчыкларга салып, җомга көнне иртән өй каршына, урамга чыгарып калдыруларын сорыйбыз. Этләр, кошлар аны ертып, таратмасыннар өчен, капчыкларны куеп калдырырга, ниндидер савыт җайларга да мөмкин, -ди Светлана Сарыйм кызы. - Шулай ук элек контейнерлар торган урыннарга каты көнкүреш калдыкларын ташламауларын сорап мөрәҗәгать итәм. Бу таләпләргә колак салмаучылар төзекләндерү кагыйдәләрен бозган өчен штрафка тартылачак.
Сүз уңаеннан, район үзәгенең көнчыгыш өлешендә капчыклардагы чүп-чарны элеккегечә, атнага ике тапкыр: дүшәмбе һәм пәнҗешәмбе көннәрне җыялар.
Следите за самым важным и интересным в Telegram-каналеТатмедиа
Нет комментариев