Туган ягым – моң чишмәм

Шундый исемдәге, әле быел гына Яр Чаллы шәһәрендә нәшер ителгән китапның авторлары - якташларыбыз Эльвира, Фәрит, Әхтәм Миңлебаевлар.

Әхтәм абый шагыйрь, композитор, башкаручы да. Кызы Эльвирада, улы Фәриттә дә сәнгатькә, музыкага мәхәббәт тәрбияли, алар да көйләр язарга остара баралар.

Китапның беренче өлешендә Әхтәм абый, аның туган авылы Лашман һәм андагы туганнары, дус - ишләре, районыбыз һәм аның кешеләре хакында языла, Ә.Миңлебаевның сәхнә тормышы турында шактый мәгълүмат бирелгән. Билгеле, болар аның һәм балаларының җырларында да чагылыш тапкан. "Лашманым", "Чирмешәнем, Чир-мешән", "Чаллыяр", "Сөюем - язмышым" һәм башкалар сәхнәләрдә еш яңгырый. Китапта җырларның сүзләре генә түгел, ноталары да бастырылган.