Күтәмә авылы Кулибины “тугызлы“ машинасын бульдозер иткән

- Ике кыш, эштән бушаган арада ясадым мин аны, җәй көне вакыт юк. Барысы да металлоломнан дисәң дә була. Шундый техника хакында гел хыяллана идем. Менә хәзер кар төртергә шәп нәрсә, - ди Күтәмә авылы остасы.

Газчы булып эшләүче якташыбыз шушы тракторына утырып, газ линияләрен дә карап кайткалый. Чылбырлы тракторы карда яхшы йөри, батмый икән.

- Аның двигателе ”Жигули”ның тугызлы маркасыннан,  тапшырулар тартмасы – коробкасы да шуныкы, ә күчәре – классиканыкы. Тышкы кыяфәте бик матур түгел инде дә, ә менә эшләргә, йөрергә яхшы, - ди ул тыйнак кына.

Юрий Семайкин шуңа охшаш тагын бер техника ясап куйган, анысы белән салам, печән, туфрак, балчык төяп була.

- Нәселегездә  берәр шундый оста бар идеме соң? – дигәч ул:.

- Белмим инде, бабай Петр Васильевич балта эшенә, агач эшенә бик хирыс иде, миңа бәлки аннан ни дә булса күчкәндер, - дип елмаеп куйды якташыбыз.  

Марат Гомәров фотолары һәм видеосы