Чирмешән районы эшмәкәрләре иҗтимагый советының яңа рәисе сайланды

Наталья Петровна Чирмешәндә сәүдә өлкәсендә эшчәнлек алып бара. Совет утырышында эшмәкәрләребезнең үткән елда башкарылган  эшләренә йомгак та ясалды.

- Бүген безнең районда 376 кече бизнес субъекты исәпләнә. Әлеге якташларыбызның иң күбе, 40 процентка якыны - сату-алу, сәүдә, 18 проценты  авыл хуҗалыгы өлкәсендә эшчәнлек алып бара, - диде район башкарма комитеты җитәкчесенең икътисад мәсьәләләре буенча урынбасары Светлана Кузнецова.

Соңгы елларда безнең районда “матурлык бизнесы”: тырнак, керфек-каш ясаучылар, чәчтарашлар, интернет аша сәүдә итүчеләр арткан. Эш башларга теләүчеләргә хезмәт күрсәтү, кунакханә бизнесы “ачык”. Эшмәкәрләребез, ни кызганыч,  җитештерү өлкәсенә дә бик ашыкмый.

Шунысы сөендерә, якташларыбыз иганәчелек белән актив шөгыльләнә. Рәхмәт,  эшмәкәрләр мобилизацияләнгәннәргә нык булышканнар. Район инвалидлар җәмгыяте дә бик күпләргә рәхмәтле, булышучылар байтак. Моның өчен шәхси эшмәкәр Роман Бадикянга район башкарма комитеты җитәкчесенең Рәхмәт хаты тапшырылды. “Щит” җәмгыяте директоры Фәрхать Мортазинны, Петр Прокофьевны район инвалидлар җәмгыяте бүләкләде.

Марат Гомәров фотолары