Чирмешәнлеләрнең күбесе йорт тирәсен чиста тота

Резеда Галимова, Лашман: - Чисталыкны үзебез булдырырга тиеш. Бу яктан безнең авылда проблема юк. Йорт хуҗалары чыга да үз тирәсен җыештыра, әйткәнне көтеп тормыйлар.

Лидия Квакова, Әккәрәй: – Безнең авылдашлар чисталыкны ярата. Хәзер бит шунысы да яхшы – һәр якшәмбе көнне район үзәгеннән машина килә, чүп-чарны алып китә. “Аны кая ташлыйм?” - диясе юк, капчыкларга җыеп, йорт каршына чыгарып кына куярга кирәк. Һәрберсе үз йорт тирәсен җыештыра. Чүп үләннәрен дә чабалар. Шунысы гына бар, тыкрыкларда, ерганакларда үсә торган үләннәрне, нигездә, мәдәният һәм мәгариф хезмәткәрләренә чабарга туры килә, менә бу эшкә дә бөтен авылдашлар кушылсын иде.

Миңнегөл Җәләева, Кара Чишмә: -Халык чисталыкка өйрәнеп килә хәзер. Элеккеге кебек чүп үләннәре чәчәк атмый инде. Җыештырабыз, чабабыз. Билгеле, һәркем үз йорт тирәсен чисталарга тиеш. Бу яктан авыл җирлеге Советы да актив эшли, өмәләрне еш оештыралар, җәмәгать урыннарын җыештыралар.

Валентина Архипова, Ульяновка: – Соңгы елларда халыкны чисталыкка өйрәтә алдылар. Авылдашлар ул яктан тәртипле, иртә яздан чыгалар, җыештыралар. Авыл җирлеге Советы бу эшне контрольдә тота, без дә, мин фельдшер булып эшлим, чисталыкны карарга, тикшерергә тиешбез. Безнең авыл бик матур, аны кайткан кунаклар да билгеләп үтәләр. Шәп, үзенчәлекле биналар, йортлар күп. Юллар бар. Алар авылны бизәп тора.

Фәүзия Шарапова, Кармыш: – Авыл урамнарында, элеккеге кебек, утын да, төзелеш материаллары да таралып ятмый. Кар да бетмәгән була, халык җыештырырга чыга. Каяндыр кемдер килеп җыймый бит инде синең йорт алдын! Чисталык – үзебез өчен һәм үзебездән тора да. Мәктәптә балаларга да бу турыда сөйлибез, төрле чаралар үткәрәбез. Әле менә мәктәп каршындагы лагерьда “Чишмәләр көне” үткәрдек. Балалар белән чишмә буйларын чистарттык. Яшьтән үк шулай өйрәтергә кирәк.

Кадыйр Гомәров фотосы.