Чирмешәндәге өлкәннәр һәм инвалидлар йорт-интернатында кыяр, помидор үстерәләр

- Теплицаны республиканың Дәүләт Советы депутаты Рәис Сөләйманов – узган елны бүләк итте, - ди йорт-интернат директоры Илшат Закиров. – Былтыр бераз соңга калдык, уңыш әллә ни булмады, ә менә быел яшелчәләр уңды.

Теплицада помидор, кыяр, борыч утыртканнар. Җәй дәвамында үсемлекләрне биредә яшәүчеләр үзләре тәрбияләгәннәр. Монда аеруча Галина Гайнетдинова зур өлеш керткән.

- Мин үзем шәһәрдә туып үскән кеше, - ди Галина Гавриловна. – 2013 елдан  биредә яшим. Безнең бит монда аерым эш юк, ә көнне үткәрергә кирәк, шуңа да һәрберсе үзенә шөгыль табарга тырыша. Миңа теплицада эшләү ошый, чүп үләннәрен утыйбыз, су сибәбез, уңыш җыябыз. Эшеңнең нәтиҗәсен күрү бигрәк күңелле бит.

автор фотосы