Чирмешәндәге мөселман зиратына капканы үзсалым акчаларына ясадылар
Чирмешәндәге мөселман зиратына яңа капка ясап куйдылар. Бу эш үзсалым акчаларына башкарылды.
-Рәхмәт яусын, игелекле егетләр: Руслан Сөләйманов һәм Дияз Фәртдинов капканы бушлай ясап бирделәр, без материаллар сатып алдык, - ди Чирмешән авыл җирлеге башкарма комитеты җитәкчесе Светлана Ганиева.
Биредә осталарга ике көн вакыт кирәккән. Мондый эш төгәллек ярата бит; дөрес үлчәм алырга, тигез итеп кисәргә, ябыштырырга дигәндәй. Матурлык та булсын. Ачык яшел төскә буялган капкага тимердән ай да ясап беркеткәннәр.
Биредә Русланның әтисе җирләнгән, ә Диязның әнисенең абыйсы мәңгелеккә күчкән. Изге урында изге эш башкарган нефтьче егетләргә Ходай исәнлек бирсен.
фото: автор
Следите за самым важным и интересным в Telegram-каналеТатмедиа
Нет комментариев