Районның инвалидлар җәмгыяте бинасыннан, борынны кытыклап, нинди тәмле ис бөркелә дисәм, Май чабу бәйрәменә коймак пешерәләр икән. Кунаклар чакырып, урамда ук самоварда чәй дә кайнатканнар.
-Мондый чараны инде өченче ел рәттән үткәрәбез, - ди район инвалидлар җәмгыяте рәисе Мәдинә Талипова. –Чирмешәннән, авыллардан да кунаклар дәштек.
Кунаклар: ветераннар, мөмкинлекләре чиклеләр үзләре дә тәм-томнар алып килгәннәр, табынны да бергәләп көйләделәр.
- Кичә үк чүпрәле камырдан коймак пешереп сыйландык, - ди Чирмешәннән пенсионер Зоя Хоркунова. - Бүген инде монда килдек. Өстәлләргә әллә ничә төрле коймак куябыз.
Утыз Имәннән Әлфия Вәлиуллинага да эш кызу – ул бүген бәйрәм үтүче бина янәшәсендә үк плитәдә кайнар коймак пешереп сыйлады.
- Иртәнге дүрттә үк торып, коймак камыры өлгерттем. Рецепты мондый: 3 йомырка, ярты литр сөт, югары сортлы он, чүпрә һәм тоз. Башка вакытта да шулай итәм.
Май чабу – Масленица славян халыкларында, Бөек постка, Пасхага кадәр, кышны озатып, язны каршылау бәйрәме буларак билгеләп үтелә.
- Карачкы яндыру, күңел ачу, коймак, кабартма пешерү кебек атрибутларга ия әлеге бәйрәм – йола атна буена сузыла, халык бер-берсенә кунакка йөрешә, гөнаһларны кичерүне сорыйлар, - ди инвалидлар җәмгыяте рәисе урынбасары Ирина Митяева.
Бәйрәмгә килгән кунаклар – төрле милләт вәкилләре, олылар һәм яшьләр җырлап, әйлән-бәйлән уйнап күңел ачтылар.
Май чабуны райондашларыбыз да игътибарсыз калдырмый, православие динендәге якташларыбыз бу көннәрдә бәйрәмнең төп ризыгы – коймак пешереп сыйланалар, бары тик яхшы гамәлләр кылырга тырышалар. Әлеге йола атна ахырына кадәр дәвам итәчәк.
ФОТОРЕПОРТАЖ
Кадыйр Гомәров фотолары
"Безнең Чирмешән"нең МАХ мессенджеренда иң мөһим, кызыклы вакыйгаларны күзәтегез.
Нет комментариев