“Сөлчә” җәмгыяте язгы кыр эшләренә әзер

-Вак-төяк ремонт калды һәм бер тракторның двигателен җыеп бетерәсе бар, - диде Хәмзә Ильяс улы. – Тагылма агрегатларны көздән төзәтеп калдырдык. Кадрлар белән дә проблема юк, механизаторлар җитәрлек, дөрес, сезонлы эшләргә берничә кеше кирәк була.

Җәмгыятьтә техниканы яңартып торалар: 2021 нче елны - яңа комбайн, 2022 нчедә  - МТЗ-82 тракторы, былтыр тагылма агрегат алганнар.

Хәмзә Хамматов сүзләре буенча, язгы кыр эшләренә орлыклары да җитәрлек, аларны тикшерткәннәр,  сыйфаты начар түгел. Орлыкларны киләсе елда яңартырга исәплиләр. Минераль ашламаларның бер өлеше -100 тоннасы инде кайтарылган, тагын шулкадәр кайтарасы калган.

-Бүген ягулык белән проблема чишелеш көтә, - диде җәмгыять җитәкчесе. – Май бар, ә менә ягулык җитәрлек түгел. Ул бик кыйммәтләнде дә.

Хуҗалыкта быел 350 гектарда – бодай һәм арпа, 250 гектарда солы, 1000 гектарда берьеллык үләннәр чәчәргә планлаштыралар. 500 гектарда чәчелгән уҗым культуралары яхшы кышлаган, диделәр.