Югары Чегодайдан Габдрахман абый Миңнекәев карлыган үсентеләрен гел яңарта

Чирмешәндә үткән ярминкәдән Габдрахман абый Миңнекәев ике төп карлыган үсентесе алып китте.

-Эре, татлы була торган сорт бу, - ди гомер буе машина йөрткән, Байконурны төзешкән ветеран. - Бакчабызда алмагач, чия, миләш тә бар. Ярминкәгә еш киләм, үз машинам бар бит.

Әхтәм абый Назыйровның да юлы уңды - чәчүлеккә орлык бәрәңгесе алды. Мондый бәрәңгене килосын 16 сумнан саттылар. Ә орлык суганы 130 сум тора.

Ульяновкадан берәү ай ярымлык дуңгыз балаларына 3 мең сум сорый.

Бу ярминкәдә килосын 65-70 сумга алма, 150-160ка - яңа өлгергән помидор, 250гә - кызыл тавыклар, шулай ук үсентеләр, балык, бозаулар, мал, кош-корт азыгы, ит һәм сөт эшләнмәләре, җиләк-җимеш, кием-салым да күп иде.

Әлкидән берәү артсыз урындыклар - табуреткалар алып килгән. Каен һәм нарат агачыннан эшләнгән әлеге ипле урындыклар 600 сум тора.