Чирмешәндә яшәүче гаилә музейга бүләк ясады

Туган як тарихы музеенда төбәгебез тарихын чагылдырган күп мәгълүмат тупланган. Музей фонды да елдан-ел артып тора.

Биредә даими рәвештә “Музейга экспонат бүләк ит!” акциясе уза. Ләкин якташларыбыз әлеге чараны көтеп тормыйлар, бирегә экспонатларны ел дәвамында алып киләләр.

-Әлеге әйберләрнең күпчелеге әле бүген дә эшли, - ди Радик Мөхәммәтшин. – Әйтик, менә бу төсле “Рекорд” телевизорын әти белән әни 36 ел элек, гаилә коргач, алганнар. Видеомагнитофон белән DVD-плеерны да куллана аласыз, икесе дә эшли. “Серенада-306”  радиоласы 1984 нче елны җитештерелгән. Мин аны Казандагы бер базардан 50 сумга сатып алып кайткан идем. Апабыз бүләк иткән тегү машинкасы да бушка гына тора, аңарда эшләүче юк. Музейга килүчеләр элеккеге көнкүреш приборларын да күреп китсеннәр.

Музей директоры Лилия Селезнева гаиләсе өчен истәлекле әйберләрен кызганмыйча музейга тапшырган якташыбызга рәхмәтен әйтте һәм әлеге экспонатларның күптән түгел генә музейда оештырылган ретро-бүлмәдә урын алачакларын әйтте.

фото: автор