Чирмешәннән Гыйниятуллиннар иң күп укучы гаилә буларак танылган

Рузилә Гыйниятуллина (Сөләйманова) һәм аның 1 нче Чирмешән мәктәбендә укучы кызлары  Язилә белән Ясминә әлеге бәйгенең “Иң күп укучы гаилә – гореф-гадәтләрне саклаучы” номинациясендә катнашканнар. Алар китаплар укыганнар, милли ашлар пешергәннәр, шуларны теркәп, фотосессияләр, видеороликлар ясап,  эшләре турында хисап тотканнар.

-Безгә укытучы ветеран, элек татар теле укыткан әниебез,  әбиебез  Сирин Сөләйманова бик нык ярдәм итте. Оныклары белән бик күп китаплар укыдылар. Соңгысында гаиләбез белән “Ак Барс кайда яши?” дип аталган, балалар өчен Татарстан турында язылган бик кызыклы китап укыдык, - ди Рузилә  Гыйниятуллина.

Нәтиҗәдә республика балалар китапханәсе Гыйниятуллиннарга сертификат тапшырган. Район үзәк китапханәсе исә Язилә белән Ясминәне тәм-томнар, аларның әниләрен кыйммәтле китап белән сөендергән.

Венера Шарапова фотосы.