Чирмешән районы башлыгы озакламый 100 яшен тутырачак ветеранны район газетасына яздырды

Ноябрь аенда якташыбызга  100 яшь тулачак.

Районыбызның иң өлкән кешеләренең берсе Георгий Васильевич 1939 нчы елны армиягә алына. Эстониядә, Литвада хезмәт итә. Аның дивизиясе сугышның беренче көнендә үк диярлек чолганышка эләгә, райондашыбызны  әсирлеккә алалар. Георгий Гришанин 1946 нчы елда туган ягына кайта, тракторчы, механик, тегермәнче дә булып эшли.

Район үзәгенең иң өлкән кешесе - сугыш ветераны бүген кызы Валентина Георгиевна белән яши, әле өйдә аякта йөреп тора, колаклары гына ишетми диярлек.

-Әти әлегә кадәр гел район газетасын укыды, “Наш Черемшан” - аның яраткан басмасы, ул  дөнья яңалыклары белән дә кызыксынды, -ди Валентина Георгиевна. – Соңгы вакытта гына үзен начар хис итә башлады. Мин үзем дә район газетасын укырга яратам,  яңалыклар белән танышып барам. Форсаттан файдаланып, район җитәкчесенә безнең әтигә шундый хөрмәт күрсәткәне өчен рәхмәтемне җиткерәм.

Автор фотосы.