Язгы җилләр Чирмешән районындагы биотермик чокырларга зыян салган

Хәзер аларны төзәтеп кую зарур. Гомумән, район ветеринария берләшмәсе җитәкчесе Алмаз Газыймов әйтүенчә, терлек калдыкларын утильләштерү өчен районда барлыгы 19 биотермик чокыр гамәлдә.

-Махсус комиссия белән аларны карап чыктык, торышлары канәгатьләнерлек. Тик Түбән Кармалка җирлегендәге чокыр территориясенең тотып алынган калайларын караклар урлап киткән. Анда ремонт ясалачак, - ди Алмаз Фараш улы.

Быел Түбән Кәминкә авыл җирлегендәге биотермик чокырны капиталь ремонтлау күздә тотыла. Монда баз тулган да.

-Мал асрау дигәннән, безнең районның көнбатыш өлешендә, шартлы рәвештә алганда, Нурлат – Кузай автоюлының шул яктагы җирлекләрендә: Иске Котыштан тотынып, Кармыш авыллары арасындагы торак пунктларда терлек асраучылар күбрәк, - ди Алмаз Газыймов.