Республикада атна ахырына кадәр суык булачак

Гидрометеоүзәк мәгълүматларына караганда, пәнҗешәмбе – 11 гыйнварда көндез термометрның терекөмеш баганасы  –14…–19 градус, көнчыгыш төбәкләрдә –22 градус күрсәтәчәк. Төнлә –24…–29, урыны белән –34 градус. Шул ук вакытта секундына 15–20 метр тизлектә көчле җил көтелә. Республиканың көнбатыш төбәкләрендә буран булачак.

Җомга – 12 гыйнварда көндез һава температурасы –10…–15, төнге сәгатьләрдә        –16…–21 градус чикләрендә тирбәләчәк. Буран, секундына 15–20 метр тизлектә көчле җил, юлларда – кар көртләре. Шимбә – 13 гыйнварда температура көндез –18…–23, төнлә –22…–27, урыны белән –30 градуска кадәр төшәчәк.

Синоптиклар, һава температурасының салкынаю сәбәпле, 10–15 гыйнварда кисәтү игълан иткән. Бу чорда тәүлеклек уртача температура –18…–24 градус тәшкил итәчәк. Нормадан 9–15 градуска түбәнрәк күрсәткеч бу.

Коткаручылар суыкта саклык чараларын күрергә: бик кирәк булмаганда, шәхси машинага утырып, табигатькә, урманга, балык тотарга бармаска, йорт-подъездларның җылылыгын кайгыртырга, балаларның ялгызы гына урамда йөрүләренә, мичләрнең артык кызуына юл куймаска, кулдан эшләнгән мичләрдән файдаланмаска киңәш итә.

Ә инде кул-аякларны өшетмәс өчен, урамда чыланмау, җылы киенеп йөрү, әйбәт туклану мөһим. Кием-салымны кат-кат кию әйбәт. Шул ук вакытта аның кысан булмавы, хәрәкәтләнүгә комачау итмәве кирәк.

чыганак