Чирмешәндә автомобильләрдә узыштылар

Чирмешәннең волейболчы ир-егетләре әүвәл 29 август көнне Яңа Чишмә районында волейбол буенча иптәшләрчә уенда катнашты. Дөрес, ярышта хуҗалар өстенрәк булып чыкты, чирмешәнлеләр 2:3 исәбе белән оттырды.

2007 елгы һәм аннан да яшьрәк яшүсмерләр арасында мини-футбол буенча Республика көненә багышланган район турнирында исә  дүрт команда көч сынашты.  Район Советы бинасы янындагы спорт мәйданчыгында оештырылган әлеге ярышта Ульяновка командасы  - җиңүче, Чирмешән-1 командасы – икенче, әккәрәйлеләр – өченче, Чирмешән-2 командасы дүртенче урын иясе. Бәйгенең иң оста уенчыларын: “Иң яхшы тренер” -  “Чирмешән” балалар һәм спорт мәктәбеннән Рафаэль Шәфигуллинны, “Иң оста сакчы” – Данир Шәфигуллинны, “Иң яхшы һөҗүмче” – Марсель Глүмовны, “Иң оста капкачы” – Азат Кәримовны аерым бүләкләделәр.

Пляж волейболы буенча ир-егетләр командалары арасында узган ярышта Ринат Сабиров һәм Илнар Җәббаров  җиңү яулаганнар.

Якташларыбыз 30 августта Чирмешән стадионында карт машиналарында да узыштылар. Анда әти-әниләр дә катнашты. Кызу, киеренке ярыш ахырдан бәйрәмчә чәй табыны белән тәмамланды.