Бүген финал: Чирмешәннең “Корыч ябалаклар”ы чемпионлык өчен көрәшә

Марат Гомәров, 18 март 2025 - 08:38

257

Кичә “Юбилей” боз сараенда алкалы хоккей буенча Татарстан беренчелегенә узган ярышларда Чирмешәннең яшь хоккейчылары финалга үтте.

Бүген финал: Чирмешәннең “Корыч ябалаклар”ы чемпионлык өчен көрәшә

2009 елда туган яшүсмерләр арасында баручы әлеге ярышларның ярым финал уеннарында әүвәл Актанышның “Лачын” һәм Азнакайның “Соколы” командалары көч сынашты, исәп актанышлылар файдасына – 5:1.

Чирмешәннең “Корыч ябалаклар”ы һәм Әгерҗенең “Спутник” командалары арасында уен аеруча киеренке узды. Тигез исәп белән тәмамланган 3 нче периодтан соң, җиңүче команда буллитлар ярдәмендә ачыкланды: бәхет чирмешәнлеләр ягында.

Нәтиҗәдә бүген Әгерҗенең “Спутник” һәм Азнакайның “Соколы” хоккейчылары өченче урын өчен уйнаячак. Ә Чирмешәннең “Корыч ябалаклар”ы һәм Актаныш “Лачын”нары алтын медаль, беренчелекнең чемпион титулы өчен ярыша. Бу уен “Юбилей” боз сараенда сәгать 11.30да башланырга тиеш.